Aaj bhi qaafila-e-ishq rawaan hai keh jo tha Wohi meel aur wohi sang-e-nishaan keh jo tha

 

Poet:Firaq Ghorakhpuri

Aaj bhi qaafila-e-ishq rawaan hai keh jo tha
Wohi meel aur wohi sang-e-nishaan keh jo tha

Phir tera gham wohi ruswaa-e-jahaan hai keh jo tha
Phir fasaana ba-hadees-e-digraan hai keh jo tha

Manzilen gard ke maanind urri jati hain
Wohi andaaz-e-jahaan-e-guzaraan hai keh jo tha

Zulmat-o-noor main kuch bhi na mohabbat ko mila
Aaj tak ek dhundlake ka samaan hai keh jo tha

Yun to is daur main be-kaif si hai bazm-e-hayaat
Ek hungaama sar-e-ritl-e-giraan hai keh jo tha

Laakh kar jaur-o-sitam laakh kar ehsaan-o-karam
Tujh pe ay dost wohi vehm-o-gumaan hai keh jo tha

Aaj phir ishq do aalam se judaa hota hai
Aasteenon main liye kaun-o-makaan hai keh jo tha

Ishq afsurda nahin aaj bhi afsurda buhat
Wohi kamm kamm asr-e- soz-e-nihaan hai keh jo tha

Nazar aa jate hain tum ko to buhat naazuk baal
Dil mera kya wohi ay sheesha-e-giraan hai keh jo tha

Jaan de baithe they ik baar havas vaale bhi
Phir wohi marhala-e- suud-o-ziyaan hai keh jo tha

Aaj bhi said-gaah-e-ishq main hussn-e-saffaak
Liye aabro ki lachakti si kamaan hai keh jo tha

Phir teri chashm-e-sukhan-sanj ne chairri koi baat
Wohi jaado hai wohi husn-e-bayaan hai keh jo tha

Raat bhar husn pr aaye bhi gaye sau sau rang
Shaam se ishq abhi tak nigaraan hai keh jo tha

Jo bhi kar jaur-o-sitam jo bhi kar ehsaan-o-karam
Tujh pe ay dost wohi vehm-o-gumaan hai keh jo tha

Aankh jhapki ke idhar khatm hoa roz-e-visaal
Phir bhi iss din pe qayamat ka gumaan hai keh jo tha

Qurb hi kam hai na dosri hi zeyada lekin
Aaj woh rabt ka ehsaas kahaan hai keh jo tha

Teera-bakhti nahin jaati dil-e-sozan ki Firaq

Shamaa ke sar pe wohi aaj dhuvaan hai keh jo tha.......!