Marte Hain Tere Pyar Se Hum Aur Ziyaada Tu Lutf Mein Karta Hai Sitam Aur Ziyaada

 

Poet:Muhammad Ibrahim Zauq

Marte Hain Tere Pyar Se Hum Aur Ziyaada

Tu Lutf Mein Karta Hai Sitam Aur Ziyaada

Den Kyon Keh Na Wo Daagh-e-Alam Aur Ziyaada

Qeemat Mein Bar'rhe Dil Ke Deram Aur Ziyaada

Kya Howe Ga Do-Chaar Qadah Se Mujhe Saaqi

Mein Loon Ga Tere Sar Ki Qasam Aur Ziyaada

Wo Dil Ko Chura kar Jo Lage Aankh Churane

Yaaron Ka Gaya Un Pe Bharam Aur Ziyaada

 

Kyon Mein Ne Kaha Tujh Saa Khudaai Mein Nahin  Aur

Maghroor Howa Ab Wo Sanam Aur Ziyaada

Lete Hain Samar Shakh-e-Samar Awar Ko Jhuka Kar

Jhukate Hain Sakhi Waqt-e-Karam Aur Ziyaada

Jo Konj-e-Qana'at Mein Hain Taqdeer Pe Shakir

Hai "Zauq" Barabar Unhein Kam Aur Ziyaada.......!